《小傳日記》TVB高層有人要走?總經理咁啱要去台灣割瘤?

　　《小傳日記》曾經大搖大擺搞淘寶直播帶貨,講到直播銷售額突破一億銀,不過最新公布嘅TVB(00511)業績都非常令人失望,以為直播可以幫到份成績表,點知中期虧損仲由上年同期2.24億銀,擴大到4.07億銀,即係直播帶貨都係雷聲大雨點小。

　　因為成績差,有本地傳媒仲報話主席許濤同總經理曾志偉要引咎辭職。不過噚晚TVB就漏夜回應話報道唔係事實,話許濤同曾志偉將會繼續帶領集團營運前進。另外,報道仲話未來TVB製作重心將會北移,以神州作為製作基地,不過TVB都係一一否認。

　　睇返份成績表,淘寶直播就屬於「電子商貿業務」一欄,今年上半年收入就係2.71億銀,反而上年同期就係4.61億銀,即係淘寶直播嘅幫助根本多極有限。TVB就解釋,主要係因為疫情過去,消費者重新出街買嘢令網購需求受挫。TVB就話,預計直播環節下半年會逐步增加,預計活動會帶來更多收入貢獻。

　　對於網上傳聞,TVB噚晚出完聲明都唔夠,今日仲會由許濤親自開記招回應。噚晚個聲明就話「許濤同曾志偉將會繼續帶領集團營運前進」,但係就無講實會唔會有職位調動。有傳TVB已經請咗78歲嘅前總經理何定鈞出山,接替曾志偉再做總經理,何定鈞就表明不予置評。事有湊巧,早一日就有報道話曾志偉因為動脈瘤而去咗台灣做手術,阿女曾寶儀都回應確認消息,亦都證實曾志偉暫時參與唔到幕前工作。

　　曾志偉出走台灣,同時又傳高層大地震,一切時間都啱啱好,唔通曾志偉真係會以「另一個身份」來「帶領集團營運前進」?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。