《小傳日記》KeeTa殺到去黃大仙!下一個新擴展區喺邊?

　　《小傳日記》美團(03690)旗下KeeTa噚日就公布提前再擴大服務區域去到黃大仙,黃大仙區居民可以經KeeTa　App領取迎新優惠。黃大仙區用戶一經註冊就可以即時領取總值300銀優惠券禮包,包括多張價值50銀嘅大額滿減券、超值專區優惠券同埋多張免運費券。

　　雖然目前KeeTa好明顯係跟住十八區,由油尖旺區一路向外擴充版圖,不過KeeTa都好特登搞咗個「區區有KeeTa」嘅投票,預先睇到邊區居民最想有得用KeeTa。當中就見到沙田嘅期待值係最高,有成38萬幾票,比起第二名嘅大埔區多兩倍。不過呢個投票都不限次數,鍾意入去撳幾吓就可以推高,換句話講一個人撳10萬吓都可以,所以都有啲流,係咪真係咁多沙田友想用KeeTa就真係唔知!

　　不過就咁來睇,普遍港島區嘅期待值都偏低,四區平均到現時為止都係得兩、三萬,唔通打工仔食晏都真係唔想用KeeTa?以網上意見來睇,普遍都對KeeTa無乜太大意見,但又

無乜特別受歡迎,所以有神州網民就覺得,以美團嘅級數落來香港闖江湖,得咁嘅成績都算係幾樣衰。有上面網民就話,主要都係運費方面有大大唔同,上面外賣員可能每單只有3至5銀人仔配送費,但係香港每單最少都要幾十銀,成本上升令到美團要重新運行過一套玩法。

　　其實對於香港人來講只係用唔用慣嘅分別,用慣就會用。其中最緊要就係親切感,講白啲就係「貼地」,自從KeeTa攻港,Deliveroo都加強咗宣傳,每日廣告都會見到林海峰、盧覓雪同黃秋生呢啲夠曬「貼地」嘅星,自然加倍親切。目前KeeTa大派優惠之外,都仲未見到有咩代言人,都好期待KeeTa嘅廣告攻勢會係點,又可唔可以做到呢種「貼地」呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。