《小傳日記》廿年造車之旅,王傳福講起都飆眼淚!

　　《小傳日記》近期業績期,不過BYD(01211)未放榜就先行被質低,連50天線都穿埋,搞到人囉囉孿咁。不過老闆王傳福就一於少理,噚日先啱啱慶祝完公司生產嘅第500萬架電動車正式交付。

　　交付儀式完咗之後,王傳福就分享返由電池行業轉做汽車行業嘅呢廿年來嘅經歷。話記得當日宣布收購秦川汽車,全個孖屐都唔睇好佢,當時股價更加由18銀跌到落得返9銀,喺而家成績咁輝煌之前,都經歷過好多「至暗時刻」。當年2008年時,BYD發布咗全球第一款量產嘅插電式混合動力車F3DM,搭載全球首創嘅DM混動技術。

　　不過當年都仲未興電動車,所以都捱咗好一段時間。講到呢度王傳福都忍唔住眼濕濕,真係講起都一殼眼淚,話「當時差啲真係行唔到落去!」但即使好多同行都已經放棄研發插電式混合動力技術,就連BYD內部都反對,王傳福都堅持要做落去。

　　到咗而家,插混車已經逐步走向電動車嘅主流,中汽協數據顯示,2023年上半年,純電動車累計銷量271.9萬輛,按年增長三成二,而插混車銷量就有102.5萬架,按年激增九成一!證明王傳福當年嘅堅持都係值得。

　　雖然而家神州電車市場大混戰,不過好多造車新勢力都係十年八年貨仔,同BYD深耕電車市場二十載始終有距離,先可以成為今日嘅神州電動車龍頭,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。