《小傳日記》SEC想禁絕美國虛幣交易?虛幣平台一定唔會硬食!

　　《小傳日記》Bitcoin今日忽然盤中低位反彈超過兩個巴仙,最多試過逼近30000美金大關。不過就喺早兩日Coinbase　CEO先大爆美國證交會(SEC)有意只係畀Bitcoin成為唯一嘅Crypto!,就話SEC有人曾經同佢講,話所有Crypto都被認定係同股票一樣,要經當局監管,所以除咗Bitcoin之外,其他無經正式程序申請交易許可嘅,都應該要被下架。

果SEC真係令Bitcoin成為唯一Crypto,將會係判美國Crypto產業死刑,所以如果行到呢一步,就惟有告上法庭。SEC就回覆話,一路都無正式向Coinbase提出呢個要求,不過如果有都「好合理」。

　　但一路都有講,雖然Crypto而家係具有交易嘅價值,不過如果將Crypto嘅根本視為證券,其實係邏輯謬誤。Crypto稱之為貨幣,因為創立嘅時候就係想用來做一種貨幣,係用來做交易嘅工具,而唔係成為被交易嘅貨物。當初創作造Crypto出來,就係因為出現雷曼事件,令到市場想有一種不受市場影響、去中心化嘅貨幣,可以用嚟自由交易。如果而家SEC一意孤行要禁絕美國Crypto,咁樣其實係會同「去中心化」相違背。

　　既然SEC都已經預告,而Coinbase都已經做好準備,幾時真係嘈到上法庭都未知,到時就真係令Crypto前景一錘定音,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。