《小傳日記》東方甄選又爆過!被罰停業反而是福不是禍?

　　《小傳日記》東方甄選(01797)今日又爆升,大升咗差唔多三成,仲一次過升爆埋條250天線,原來又有賺錢新橋。

　　話說東方甄選早排終於自立門戶,開咗自營app,所有直播收入「歸me」,一於肥水不流別人田。未有自營app之前東方甄選一直都係靠抖音做直播,所以東方甄選愈來愈多人睇,抖音都係有得益嘅,不過而家東方甄選自己搞一壇,當然就會少咗依賴抖音。

　　而今次東方甄選嘅抖音直播間被關閉,主要都係因為早兩日,有直播主唔小心將產品嘅barcode　show咗出來。雖然直播主唔係故意,不過抖音就有規定,如果show到任何code,會被視為刻意引流去自有app到落單,所以抖音就要罰東方甄選直播間停業3日。

　　不過抖音今次都算捉蟲,東方甄選被停業之後一於就集中喺自己地方做直播,26號晚即時決定喺自營app做85折優惠。結果今日就公布,自有app單日銷售額突破3000萬人仔,再次刷新紀錄。東方甄選方面就話,幾十萬用戶湧入app掃貨,要緊急為多個自營產品增加庫存。喺蘋果內地版app　store都可睇到,東方甄選喺購物類app排名由第8位飆到去第5位。

　　今次東方甄選因禍得福,再次證明自立門戶嘅實力,唔使依賴抖音,都已經成功建立咗消費者嘅忠誠度,就算之後真係唔靠抖音,靠自己都可以搵到錢,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。