《小傳日記》阿里雲通義萬相可以生成相似圖,版權歸邊個好?

　　《小傳日記》上星期巴巴(09988)旗下螞蟻就被中證監公布要罰71.23億人仔,雖然罰得甘,但係孖屐覺得終於公布罰則反而係鬆一口氣,上星巴巴就是升3巴仙到,今日最多升過5巴仙,不過89銀、90銀前阻力都大少少,最後今日都係升3巴仙左右。

　　上星期除咗螞蟻終於鬆一口氣之外,阿里雲都發布AI繪畫創作大模型「通義萬相」,一聽就知係之前「通義千問」嘅兄弟姊妹。阿里雲首席技術官周靖人就話,通義萬相希望可以畀唔同行業廣泛使用,包括電子商務、遊戲、設計和廣告等,甚至連藝術創作同創意表達都可以。

　　通義萬相可根據中英文指令生成唔同藝術風格圖像,包括水彩畫、油畫、國畫、動畫、素描等,仲可以改變原圖嘅風格,連解像度、構圖準確度都可以糾正返。就算係同一張圖、同一個風格,都可以重新生成一張「相似圖」。

　　不過諗落相似圖生成都仲有好多疑慮,如果內容同風格都一致,咁相似成點就會觸犯知識產權?雖然而家用Google就可以搵到好多張所提供指令嘅圖,但起碼原圖都版權,正規做法一係要畀錢買圖,一係要引用時列明出處。但係基本上AI生成所生成出來嘅圖,版權係屬於AI模型,如果AI模型係基於某一幅有版權原圖來生成,咁用家引用咗,咁會係計AI模型侵權定係用家侵權?其實而家都無好講明究竟要相似度有幾多先構成侵權,如果AI生圖,甚至係相似圖AI興起,咁到時知識產權嘅定義一定要好清楚。

　　如果要用科技同科技拗手瓜,如果每一張相似圖嘅生成結果,都可以用blockchain來記錄返係由邊一張圖生成出來,即係每張都會自帶原圖嘅資料,就可以徹底保護知識產權,不過都只係一個奇想,實際上都要blockchain普及先可以做到,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。