《小傳日記》東方甄選直播做埋旅遊節目,好賺就要繼續!

　　《小傳日記》運作超過一年嘅東方甄選(01797)出咗新app,由最初只係依賴抖音等等channel做直播,到而家直頭開埋自己app,以後都唔使寄人籬下。

　　就咁撳入app到,都好似平時入到carousell或者淘寶咁嘅介面,用起上嚟都係方便就手。不過講起東方甄選,梗係直播先係主力啦,為咗谷新app,由7月5號起至11號,東方甄選會搞甘肅專場直播活動,由老闆俞敏洪親自帶隊,比起普通直播帶貨,更加似係旅遊節目,將會遊走蘭州、張掖、酒泉同嘉峪關等等名勝景點,通過一場文化旅遊來展現絲綢之路嘅吸引力。

　　東方甄選都唔係第一次搞團,就啱啱618呢次,東方甄選搞咗次四川專場,去到四川嘅供應鏈源頭直接帶貨,有統計顯示,四川呢次GMV一共成億銀人仔,收睇直播人次超過4000萬,所以可能食過翻尋味先有今次嘅甘肅行。

　　東方甄選由雙語直播帶貨,到而家直頭遠赴埋當地,仲搞埋旅遊直播呢瓣,睇來之後落去就可以由直播帶貨,擴展去到直播咩都得,等同於快手(01024)等等嘅直播股,不過都係後話,目前先做電商都可以有好遠路要行,加上已經有淘寶、京東(09618)等等嘅大型電商,東方甄選除咗雙語直播之外,仲有咩特色可以撐得住,都係之後可以點立足嘅一項重要因素,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。