《小傳日記》商湯炮製圍棋機械人,勁到能人所不能?

　　《小傳日記》大家仲記唔記得AlphaGo呢?呢個由Google旗下公司設計嘅人工智能系統,2016年以4比1擊敗當年嘅世界圍棋冠軍李世石,之後更加「過五關,斬六將」,一個又一個頂級圍棋手都要輸。

　　到今日,研究人工智能嘅商湯(00020)就發布「元蘿蔔」AI下棋機械人(圍棋版)。商湯副總裁沈徽介紹指,舊年8月集團發布象棋機械人,當時有聲音指希望開發埋圍棋機械人,但圍棋變化更多,研發難度更大。沈徽又指,「元蘿蔔」配備嘅機械臂能做到高精準嘅取放棋子,以往咁高準密度嘅機械臂只係用喺工業用途,但商湯利用AI技術,以手眼協同方式,大幅加強機械臂精密準和降低製造成本。

　　「元蘿蔔」建議零售價3999人仔,今日開始接受預售,預售期間嘅到手價係3799人仔。同時,具有專業版所有功能,配備移動電源同專屬拉桿收納箱嘅「大師版」,建議零售價4999人仔,依家喺京東(09618)同天貓官方店同步開始預售。沈徽指出,元蘿蔔可以成為棋手嘅專業陪練,用家可選擇不同嘅對弈難度,實力水平覆蓋業餘20級至職業9段,令唔同用家可以搵到實力相當嘅對手。

　　就咁睇,「元蘿蔔」用嚟做培訓用途,但如果同人類對打嘅話,AI又有冇著數呢?當然,AlphaGo依家所向披靡,但同佢相同級數嘅AI系統今年曾經畀一位美國業餘圍棋手擊敗,仲要連輸15場添!其實AI都唔係百分百完美嘅,當呢套系統未能夠學習足夠招式,總會有被擊敗嘅一日。「元蘿蔔」面世之後,睇下又會唔會掀起另一場「圍棋之爭」喇!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。