《小傳日記》注意看!短視頻配音聲原來係來自出門問問魔音工坊?

　　《小傳日記》話說早排就傳神州AI公司出門問問要落嚟敲鑼,最新就見到出門問問已經遞咗招股書,籌幾錢都仲未知,不過聯席保薦人嗰欄就見到係之前傳嘅中金同招銀國際。

　　睇返融資情況,由天使輪到D輪,融資金額最少應該超過2億美金,投資機構包括紅杉、大眾汽車同埋Google　Ventures。當中Google同出門問問嘅關係都唔淺,除咗參與C輪融資,老闆李志飛都曾經係Google總部科學家。

　　雖然融資機構間間響噹噹,不過科技公司初期都難免蝕錢,由2020年賺5600萬人仔,到2022年要蝕6.7億人仔,所以公司都好急於搞IPO籌錢融資。

　　聽曬上面嘅嘢可能都唔係好知呢間出門問問,不過聽「聲」可能就會易認啲。出門問問旗下最出名就係魔音工坊,魔音工坊係一個AI影音剪輯神器,最犀利就係可以AI配音,打好條稿掟上去就可以自動生成錄音檔。而且唔係單一嘅AI聲,而係可以揀用男男女女,咩類型咩角色嘅聲都有。

　　不過單係魔音工坊嘅面向只係一般短視頻創作者,要擴大收入都係唔夠,所以出門問問都積極發展AIGC,即係ChatGPT式嘅AI對答模型。不過百度(09888)、商湯(01024)等等科技大佬都搞緊,出門問問又有咩能耐可以爭得過,就真係要再留意,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。