《小傳日記》要unfol咁大劑?幣安老闆頂唔順馬斯克亂炒幣?

　　《小傳日記》馬斯克自收購咗Twitter之後,做起CEO上嚟成日被人插佢愈搞愈禍,於是啱啱個weekend終於宣布請新嘅CEO,就係之前NBC嘅高層Linda　Yaccarino,呢位新CEO一向擅長廣告銷售,孖屐就相信佢會幫到Twitter開拓到廣告收入來源。

　　始終都係自己生意,唔買都買咗,都要好好經營,馬斯克肯放低面子搵個會經營得更加好嘅CEO,都係正確嘅選擇。不過惹火嘅佢近期疑似又同人有嗌霎,另一位主角就係幣安創辦人趙長鵬。近期有網民就發現,曾經有份同馬斯克一齊夾份買Twitter嘅趙長鵬,近期就unfol咗馬斯克,即時令到幣圈有無限猜測。

　　網民都有好多唔同好似幾合情合理嘅推斷,其中一個係趙長鵬終於頂唔順馬斯克嘅炒幣金口,只要佢輕輕提過,某啲名不經傳嘅meme幣就可以炒起,直頭到點石成金嘅地步,好似之前就share過一張Pepe　meme圖,結果當日PEPE幣就即刻炒起超過一成。

　　不過馬斯克一向都係咁玩法架啦,又點會今時今日先唔likey?所以就有人推斷係因為近期馬斯克邀請咗eToro做Twitter嘅交易所合作方,而eToro都係另一個crypto嘅交易平台,可能就係咁令到趙長鵬呷醋而怒刪馬斯克。不過馬斯克咁跳tone,可能過一排無乜嘢又可以同返趙長鵬搭住膊頭咁出現呢,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。