《小傳日記》五一數據初步出爐!民航人次同電影票房都爆數!

　　《小傳日記》今日同聽日都仲係神州五一假期,所以北水繼續放假中,今日魚缸就算有大象滙控(00005)恢復派季息帶動,全日成交都只係得700幾億銀。

　　既然仲放緊假,就睇吓同胞放假有咩好玩。據《央視》引述民航局數據,4月30號民航運輸旅客173.62萬人次,已經恢復至疫情前2019年同期嘅96.5%,航班數量更加係2019年嘅100%有多!證明今次五一真係神州復常嘅重大指標,民眾嘅消費意欲相信都要回升喇!

　　講起消費,五一假期經常都係電影界嘅重要檔期,而趁著今年係復常之後第一個長假,神州總共有19套新戲上映,堪稱「史上最熱鬧的五一檔期」,截至5月1號晚,總共有3套戲已經

達到過億人仔票房,包括空軍主題《長空之王》、家庭喜劇《人生路不熟》同埋愛情片《這麼多年》,就呢三套啱啱好符合曬各大觀眾層面嘅需要。

　　其中《長空之王》,就係之前講過嘅神州天王王一博主演,原定係舊年國慶檔期上映,不過戲入面有涉及空軍戰機元素,廣電總局擔心國慶檔期上映會比較敏感,所以就換成今年五一檔再上架,據報就係為免政治敏感題材會喺國慶期間節外生枝。

　　總知今次五一呢批數據,反映到民眾生活同娛樂都正式復常,就算今日公布神州製造業PMI跌穿50,相信之後情況都有望改善,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。