《小傳日記》智利打算將鋰礦國有化,BYD表示「無有怕」!

　　《小傳日記》智利過去係通過特許開發合同,授權兩間私營企業開採鋰資源。不過,政府近日突然宣布,計劃採用國家同私人部門合資嘅方式,促進當地鋰產業的發展。

　　智利政府會成立一間國家鋰業公司,所有參與智利鋰業,無論當地或外國私營企業都必須同國家鋰業公司合作,政府會喺合資企業中持有控股權。呢個計劃仍然需要獲智利國會批准,總統博里奇話會喺今年下半年向立法機關提交計劃。

　　呢單消息震散鋰礦相關嘅股票,連新能源車龍頭嘅BYD(01211)噚日都要跌近3巴仙。公司之後公布,喺智利拎到磷酸鐵鋰正極材料嘅生產資格和建廠許可,成為智利生產促進委員會指定嘅生產商,以優勢價格攞到智利礦業化工集團生產嘅原材料供應。2030年前,供應量每年可達到11244噸。

　　另外,BYD智利分公司簽署相關合同,攞到喺智利北部安托法加斯塔地區建設鋰電正極材料工廠嘅許可。規劃年產量5萬噸,總投資預計2.9億美金以上,計劃2025年尾正式開始運營。

　　由噚日面對突如其來嘅狂風暴雨,到今日一天光晒,BYD今日升超過4巴仙,收復晒噚日嘅跌幅。不過就仲要面對「股神」減持同新能源車減價戰嘅兩大陰霾,都唔可以太過開心住呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。