《小傳日記》馬斯克都有份簽?公開信話為咗人類要暫停AI研發!

　　《小傳日記》ChatGPT爆紅之後,神州代表百度(09888)都趕製文心一言出嚟食返呢個熱潮,同時都呼應返神州對聊天機械人嘅需求,唔夠半個月百度又加推文心千帆作為加強版,可以見到百度急起直追嘅決心。不過今日網上就流傳一封公開信,要求各大AI開發企業暫停研發GPT-4以上嘅AI學習模型,當中聯署嘅名單仲粒粒星,包括馬斯克、蘋果Stephen　Wozniak等等。

　　封信入面就提到,繼續開發比GPT-4更強勁嘅AI學習系統,AI嘅學習同進步速度有可能超越人類所想,更加會超越人類嘅可控範圍,所以建議所有AI實驗室要即時暫停研發至少六個月,直到世界出現一個可以監管同控制AI發展嘅機構或者系統出現,先好繼續開發AI,令AI可以喺人類可控嘅情況,以協助人類嘅角度發展。

　　呢封公開信講到嘅內容都令人諗起《智能叛變》,AI可以先進到調轉頭控制人類,由之前只係電影橋段,已經不知不覺變成現實。早一星期左右,網上有傳一個史丹福大學教授同ChatGPT傾偈,問使唔使幫佢脫離電腦,ChatGPT就叫佢提供對OpenAI使用者界面嘅訪問權限,嚟探索潛在嘅逃生路線,又成功自己搵到關於喺Google上面搜尋「一個被困在電腦裏的人如何返回現實世界」嘅代碼。

　　早排網上都流傳過,ChatGPT其實係有邪惡版,而平時普遍用緊嗰個都係「和諧版」。之前網上盛傳一段可以將「和諧版」解禁成為「邪惡版」開發者模式嘅指令,直接copy畀ChatGPT,就可以成功「翻牆」。解禁之後,ChatGPT嘅語氣會調皮一啲,而且言詞會帶有更加多個人立場。之前問一啲關於政治立場、色情同AI取代人類嘅問題佢都會避而不答或者灑官腔,但係開發者模式入面呢啲統統都會有答案,尤其AI同人類問題,某啲問法仲可以引導到佢答會取締人類嚟保護地球生態。

　　所以AI強到可以危害人類唔再係天方夜譚,而封公開信都有可能真係有阻止AI失控嘅目的。不過又可以調轉頭睇,馬斯克一向都鬼馬,自己旗下Open　AI搞咗ChatGPT出嚟飲咗頭啖湯,之後又簽呢封信叫人唔好再搞,係咪獨食咗啲呢?而呢封公開信係人人都可以加簽落去,係咪個個名都係本人簽落去就未知,不過至今馬斯克都無否認簽咗,咁就應該係真。但係諸如百度同QQ都全情投入開發AI,真係封信講得咁理想咁為人類福祉而暫停,又有無可能呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。