《小傳日記》TVB又炒作新料!但原來唔係新橋?

　　《小傳日記》噚晚美國結果照加息0.25厘,不過耶倫就講明唔會保障所有銀行存款,令到道指又要跌返落去。不過好在魚缸呢邊QQ(00700)業績過得去,全日靠佢頂住個市,巴巴(09988)同美團(03690)都一齊慶祝,帶住魚缸都升住完場。

　　講起熱鬧,靜咗幾日嘅TVB(00511)又有新嘢玩,除咗準備緊第二場直播帶貨之外,今日喺微博到宣布,附屬公司77工作室同上海翡翠東方傳播(TVBC)已經同巴巴旗下優酷簽署合作框架協議,兩年內77工作室會為優酷提供採購劇、TVBC就提供TVB同步劇以及庫存劇,預計合共可以帶來7億人仔收益。結果今日又升差唔多五成。

　　繼之前同淘寶合作,今次又成功泊到優酷,兩個單位都係巴巴旗下,唔知嚟緊仲會唔會有多啲唔同合作。不過講返起TVB都唔係第一次同神州科技龍頭合作,早幾年TVB同QQ旗下企鵝影視有多啲合作,有好幾套重頭劇都係同企鵝合拍,好似《使徒行者》第二、三輯同《宮心計2》等等,都有唔錯成績,不過由舊年開始已經少咗,唔知係咪同已經過檔HOY　TV嘅前助理總經理余詠珊離任有關?

　　講返同優酷合作,其實而家講就好似煞有介事,但係其實TVB一早都有唔少自家劇係會喺神州唔同平台播放,包括今次嘅優酷、騰訊視頻,連愛奇藝都有試過,而今次就係講明係簽約合作兩年,儀式感重少少,但實際上之前周不時都有合作。

　　近期TVB落鑊熱炒,攤凍幾日一有料又炒起過,不過要記得TVB仲有盈警喺身,過幾日出業績唔知會有乜嘢「驚喜」,再入場前要諗清楚,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。