《小傳日記》原來是「鎳」造!摩通買鎳變石頭唔會提告?

　　《小傳日記》美國聯儲局準備議息,加上銀行業危機又未消除,今日魚缸都偏靜,全日總成交得1000億多啲,最快都可能要等議息結果出嚟先可以熱鬧返。

　　近期除咗睇實邊間銀行爆煲,生發發(00388)旗下倫敦金屬交易所(LME)又出事,仲要又係「妖鎳」惹嘅禍。噚日LME公布,喺荷蘭鹿特丹一個鎳倉庫,有54噸鎳被偷龍轉鳳成為幾袋石頭,涉及9份合約,按現價計價值大約130萬美金,即係大約1021萬銀港紙。由於事件影響,亞洲時段鎳交易再推遲一星期到3月27號先會重啟。

　　到今日就再揭出,被貍貓換太子嘅「苦主」,即係嗰9份合約持有人就係摩通。舊年LME出現外資大行對決神州鎳龍頭青山控股嘅挾淡倉事件,引致鎳價飆升,令到LME都要出手暫停部分鎳交易。事件後來令到LME被成班基金大戶告上庭,至今一年有多都仲有投行出嚟要問LME追數。而講起呢場大戰摩通都要跌1.2億銀美金,今次又出現調包事件,真係好一段「鎳緣」。

　　不過原來呢段已經唔係今年第一單「鎳造」事件,今年2月商品交易公司Trafigura就公布,上年12月買咗一批鎳,當一部分集裝箱運到嘅時候發現裏面根本沒有鎳,完全中伏,令公司可能要勁蝕5.77億銀美金,而且將計入今年上半年財報。

　　由此可見期貨真係幾神奇,任憑孖屐炒到癲,最原本嗰件貨只係一直攤喺倉庫入面,甚至原來買賣緊嘅根本唔係鎳而係石頭都未定。尤其期貨唔係現貨,買緊乜就係講個信字,今次LME揭開原來會有「頂住檔」先嘅情況,明顯就係再一次打擊孖屐信心,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。