《小傳日記》海底撈即日起唔畀自帶火鍋料,要搞好管理就係必要!

　　《小傳日記》陰吓陰吓恒指終於跌到落兩萬,不過今日都未做好準備要跌穿兩萬,最低都係試到20006,最後危危乎都算守得住,算係畀個機會人走得就走啦。

　　噚日就有上面記者發現,海底撈(06862)即日開始唔畀人外帶火鍋料入場。香江呢邊就一直都無呢支歌唱,但原來上面原本係可以自帶任何火鍋料入場烚吓烚吓,據講蝦蝦蟹蟹仲可以拎入廚房幫你劏埋而唔額外收錢。

　　不過而家就唔得了,有記者直接打去客服到問,嗰邊就回應話因為出於食材同用餐安全考慮,於是就唔畀自攜食材,不過嘢飲都仲係可以自帶,如果有咩想食就同客服講,佢哋會考慮加入menu咁話喎。

　　自從2021年海底撈開始「啄木鳥計劃」要破釜沉舟咁擺脫以前嘅管理方式,好多嘢都要改,首先就係執笠一堆搵唔到錢嘅餐廳,2021年7月至2022年6月,總共就執咗291間門市。叫得「啄木鳥」就證明有心想將所有害蟲,又或者係在害蟲清除,而唔畀自攜食材都應該係其中一步。

　　如果以風險管理嚟講,畀客帶外來食材入門市食其實係好大風險,因為出咗事有食物中毒真係唔知係咪海底撈供應嘅食物出事,計起上嚟都唔知入邊個數,所以係絕對應該要避免呢個風險。相反即使係外帶嘢飲,原本都係工廠密封出廠,相對出事機會細好多,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。