《小傳日記》宇宙大戰未打就玩完?落地轉搞聊天機械人仲化算!

　　《小傳日記》ChatGPT概念瞬間掘起,連全世界科技大佬都一時間反應唔切,之後先急急腳掟大錢入局,不過有心唔怕遲,趁而家加快速度整個性能跑得贏ChatGPT嘅聊天機械人都係一個目標,當然唔好好似Google咁就出醜啦。

　　而家全世界都急轉彎轉追聊天機械人概念,偏偏之前嘅大熱元宇宙概念就淪為一粒星塵,之前成批磨拳擦掌「宇宙大軍」都無曬影。最近QQ(00700)就公布,旗下XR業務會變更發展路線,相關業務團隊會進行調整,仲會為受影響員工提供兩個月過渡期,仲會優先安排轉部門面試同外部推薦機會。

　　不過有內部員工就話,QQ都未將元宇宙掟入黑洞,仲會考慮其他發展方向。不過以目前嚟睇,落返地搞AI聊天機械人大戰先係頭等大事!ChatGPT爆起嘅速度遠遠超過科技大佬嘅預期,就連本身專注做遊戲嘅網易(09999)都要將旗下遊戲角色轉成類ChatGPT嘅聊天機械人,畀玩家一個更加栩栩如生嘅互動,就知QQ點解要落返地搞咗先。

　　而科技大佬轉軚轉得咁快,都因為聊天機械人嘅入場門檻低得多,無論對科技公司同消費者都係。有做開AI嘅公司好似百度(09888)咁,其實只要喺原有嘅AI模型加啲嘢,就可以變成「文心一言」聊天機械人,連網易都可以咁輕易將角色變成類ChatGPT,就知其實好容易就可以將技術扯上聊天機械人概念。相反喺元宇宙,要真實體驗到生活喺元宇宙就至少需要一副VR眼鏡,閒閒哋都二三千銀,未見官已經先打三十大板,但係ChatGPT目前都係免費使用,而且普通一部電腦都入到,實際日常工作可以好有效咁用得到,都係ChatGPT爆得咁快嘅原因。

　　至於元宇宙都未「完」嘅,不過相對仲要投入更多人力財力,計完時間值都係搞咗聊天機械人先比較化算,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。