《小傳日記》航天科技失控急墮地!一切都係北水財技?

　　《小傳日記》魚缸今日就好似發咗一場白日夢,朝早高開134點之後就一路爆上,最多試過差唔多升500點,不過下晝就嘔返出嚟,全日最終都只係升175點!

　　今日都仲有另一隻股發咗一場夢,香港航天科技(01725)連升7日上過太空一轉之後,今日終於返落地球!航天科技今朝都仲升緊,最多試過升差唔多兩成,不過下晝就快兩點就開

始嚟料,兩點正前嗰5分鐘內就急跌咗一成,之後就洗倉式暴跌,最多跌過落10.72銀,全日最高最低差7銀錢有多!

　　有數據就顯示呢段時間嘅升幅,一直都係北水嘅操作。航天科技今個月開始就一直升唔停,好早就已經有人見到每日流入嘅都係北水資金為主。雖然連日嚟都疑似有唔同消息推升股價,又

成功發射衛星,又投資太空港等等,不過升勢太驚人都令孖屐好有疑問。而呢隻股一向都係得北水炒作,就算2月開始飆升之前,北水持股量已經佔咗流通股份嘅六成八,總股本嘅兩成三。過去呢半個幾月入面,北水掃貨令持股量更加佔咗流通股份嘅七成八有多。

　　原來北水推高股價原因,就係為咗要避免隻股剔出港股通。港股通有例,屬於恒生綜合小型股指數成份股且不屬於A+H股嘅港股通股票,調整考察日前十二個月港股平均月末市值低於40億港紙,就要剔出港股通。而今日下晝暴跌之前,公司市值啱啱過咗40億銀,之後就正式暴跌,好難唔令人覺得同呢件事有關,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。