《小傳日記》白酒第一股準備上市中,醬香酒濃香酒有咩唔同?

　　《小傳日記》仲兩日左右就過年,過節氣氛濃厚相對成交就要淡靜,今日總成交連1000億都唔夠,睇嚟大家都已經放假mood。

　　過年咁喜慶就睇吓酒,神州白酒廠珍酒李渡就已經同聯交所交咗招股書,準備落嚟敲鑼。雖然A場酒股一直都好熱炒,不過魚缸呢邊除咗幾隻啤酒股之外就無乜酒股,更加唔好像講燒酒白酒類。今次珍酒李渡落嚟上市都可以算係「白酒第一股」。

　　珍酒李渡其實已經講明自己賣乜,分別就係「珍酒」同「李渡」,呢兩款酒喺2022年就已經佔咗八成收入。其中最大收入來源就係珍酒,2022年珍酒銷售額係27.64億人仔,佔全年六成半收入。

　　以酒型分別嚟講,珍酒係醬香型白酒,李渡係兼香型白酒。神州白酒主要分為四大類,濃香型、醬香型、清香型同米香型,而兼香型就係四大香型嘅變化體,大致可以再細分做八種。而其中目前最多人追捧就係醬香型白酒,「國酒」茅台酒都屬於醬香型白酒。醬香酒價錢普遍都會貴少少,因為生產步驟繁複得多,據講生產時間最少要一年,然後經「九次蒸煮,八次發酵,七次取酒」,再陳放五年先可以出廠。勾兌次數都可以睇到分別,醬香型最少要七次勾兌,濃香型就兩至三次已經可以。

　　醬香型同濃香型據講風味係唔同嘅,有介紹就話醬香型嘅香氣係會持久一啲,正係「空杯留香」,而且因為經過多重勾兌,酒香會多層次一啲。唔講味道,據2020年數據,雖然醬香酒只佔神州兩至三巴仙產量,但係利潤就佔咗全行嘅三成半,足以見到點解各大酒廠同孖屐都熱捧醬香酒。

　　雖然珍酒屬於醬香酒,不過價錢只係次高端,即係每500毫升600至1500人仔,相反李渡價錢就屬於高端,每500毫升要1500人仔以上。珍酒李渡正式敲鑼之後魚缸就會多咗一個白酒板塊,遲吓睇吓仲會唔會有多幾間落嚟敲鑼,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。