《小傳日記》QQ美團齊齊反貪腐,新年唔使周圍顧!

　　《小傳日記》魚缸22000前都係爭持續激烈少少,今日仲試過跌160幾點,其中一個最大元兇就係美團(03690),最多試過跌成5個幾巴仙,試過連條100天線都無埋,好在有抄底資金進場護盤先企得返上去。

　　消息面上就有,上個禮拜五美團啱啱就公布咗「2022年生態反腐公告」,公布2022全年總共查處刑事案件41單,移送司法機關107人,當中47個係內部員工,60個係生態合作商等外部員工,另外仲同41間涉及廉潔問題嘅合作商割席。其中涉及內部員工嘅31單刑事案件入面,有收受合作商賄賂、虧空公款、竊取商家利潤、虛報旅費等等,涉案人士都已經被刑事拘留。

　　唔知係咪孖屐發現美團內部係咁所以今日要沽佢,不過今日就輪到QQ(00700)都公布咗反舞弊通報,2022年全年QQ總共發現70幾單觸犯「騰訊高壓線」案件,百幾人因而被炒,十幾人被送官究治,23間商家列入永不合作名單。

　　雖然日子唔同,不過QQ同美團公布出嚟嘅格式大致上都差唔多。「反貪腐」呢啲keywords當然都係阿爺嘅喜好,農曆年前公布,正正都有去舊迎新嘅感覺。同時表明自己全力以赴反貪腐,正好畀上面睇到自己有幾出力跟隨主旋律,新一年都可以少啲打壓,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。