《小傳日記》海昌海洋大洗倉,散戶被陰乾?

　　《小傳日記》多得花旗國大肆放鴿,魚缸終於成功掂返19000大關,可惜都係一觸即跌,全日都唔夠力再上返去,可能都區間上落多一排先!

　　話說今日有隻唔係好出名,不過時不時見到佢嘅海昌海洋公園(02255)忽然洗倉式急跌,今朝最多跌足七成,缸友對於呢隻名不經傳嘅奀股忽然急跌都顯得一頭霧水。後尾有內媒就

推敲咗佢暴跌嘅原因,其中一大原因可能係同MSCI指數有關。報道就提到,其實一直都有莊家會炒MSCI指數調整,而做法就係將公司股價不斷拉高,將市值、交易量維持喺MSCI指數嘅納入準則下,成功獲拉入指數而且MSCI生效後,就會正式收割,其實就係類似微信女嘅操作,不過都只係傳聞。

　　海昌今日晏晝就出公告話「並不知悉有關該等股價或成交量變動之任何原因」,不過據聞已經同內媒放風話有關「公司控股股東出售45%股份」係不實消息,又暗示股價暴跌可能與公司賣盤報道有關。

　　其實海昌係喺內地唔同地方都有營運海洋主題公園,好似香江間海洋公園一樣都有好多海洋動物睇,另外仲簽咗好多獨家IP返嚟,其中一隻就係日本特攝片嗰隻超人。另外海昌都一直轉型做輕資產,即係將硬件配套轉畀大地產發展商嚟做,自己慢慢轉做只係參與營運方面,盡量減輕負債。不過若果背後真係牽涉到微信女,今日真係跌得無辜,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。