《小傳日記》康希諾連跌兩日，唔係因為藥價減半咁簡單？

　　《小傳日記》美國中期選舉如火如荼，暫時睇共和黨喺眾議院仲有少少優勢，拜登剩低嘅任期會唔會好難捱呢？另外，前總統「侵侵」話下星期二（１５日）有「重大事情」要宣布，外面已經吹到話佢會參選總統，再次挑民主黨機，未來白宮睇嚟會有一場好戲睇喇！

　　講番魚缸，今日仲係升唔破萬七關。早排升得嘭嘭聲嘅醫藥股，今日（９日）都有幾明顯嘅回調，例如康希諾生物（０６１８５）。股價由１０月２４號開始連升７日，當中１１月２日公

布吸入式疫苗喺多個城市使用，股價單日急升超過六成三，嘭一聲彈到去最高１４７﹒５銀。不過，近幾日股價無再升得咁厲害，噚日同今日都跌住咁收。

　　近日北京市醫療保障局話，第七批國家組織藥品集採中選結果會喺１１月執行，藥價平均降幅預計超過五成，累計降低藥品費用達７５億元人民幣，藥品類別已實現化學藥品、生物製品同中成藥三大領域全覆蓋。北京開始行藥品集採，藥價仲要劈超過一半，醫藥股當然唔ｈａｐｐｙ喇，噚日康希諾喺Ａ場都跌超過５巴仙。

　　不過，同康希諾更加直接嘅，相信係畀人減持嘅消息喇。睇番聯交所資料，１１月３號，美國資本集團（Ｔｈｅ　Ｃａｐｉｔａｌ　Ｇｒｏｕｐ　Ｃｏｍｐａｎｉｅｓ　Ｉｎｃ﹒）減持康希諾生物Ｈ股，係近半年第７次減持，持股比例由２５﹒１１％降至１９﹒５３％，持股數由約３３３１萬股降至約２５９１萬股，累計減持７４０萬股。之後一日，美國資本集團繼續減持康希諾生物Ｈ股，今次減持總共１６６﹒７６８２萬股，每股作價１１４﹒５８銀，總金額約１﹒９１億銀。減持後，最新持股數目只有約２４２４﹒１３萬股，最新持股比例降到得番１８﹒２７％。

　　睇日線圖，股價嘅９ＲＳＩ喺１０月２６日開始已經升破晒嚴重超買區，呢排無乜消息可以炒，股價順勢回調番都合情合理。不過，康希諾展開升勢之際，美國資本集團突然密密咁沽貨，唔通因為公司估值過高？定係覺得康希諾嘅前景一般？聰明錢係咁沽貨，大家記得睇路呀！請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。