《小傳日記》Manus股價分析似模似樣,AI在手散戶要翻身?

Manus引爆網絡,營銷鋪天蓋地,號稱係「DeepSeek之後,又一個科技圈的不眠之夜」,甚至有部分KOL嘅用詞特別誇張,例如「驚豔全球」、「國運級別成就」、「Agent嘅iPhone時刻」。最癲係內地二手交易平台閒魚有人出售體驗邀請碼,甚至炒到10萬蚊!但僅僅一日嘅時間,Manus嘅口碑就兩極分化,開始出現有人話Manus係套殼、縫合怪、響應極慢等等。筆者唔係專業搞科技嘅,亦唔多評價,但喺官網試玩佢個「特斯拉股票分析交互式面板」之後,真係有啲感慨--原來我哋呢班打工仔喺度扮晒巴菲特睇財報,人哋AI已經進化到自己幫你搵曬網上嘅信息,用專業嘅分析模型,推演股價走勢,教你點走位賺錢。

　　成日都有人話,我哋以為AI會幫我哋洗碗抹地,點知最先取代嘅係畫畫、作曲呢啲創意性工具,其實原因就係大語言模型只係眼同大腦,問答式AI工具就係口,但係無手,唔可以落手落腳去執行一啲複雜嘅操作,所以下一個投資風口必然落喺AI　Agent,就好似你請咗個全能助理一樣。AI　Agent唔單止可以話畀你知相關嘅信息,佢仲可以通過以自主拆解用戶嘅任務,獨力調用工具且完成任務,例如直接幫你訂機票,預約醫生、剪片等等。

　　睇返Manus生成嘅關於特斯拉投資嘅交互面板,頭一眼睇落去,感覺都幾靚仔,排版仲有啲美感,結論清楚,用咗好多圖表嚟講解啲數據,重要信息用bullet　points呈現,睇落去都幾有條理。如果攞去畀教授睇,應該無A都有B+。

　　再認真睇返D內容,Manus分析特斯拉嘅股票,分析咗財務表現、估值分析、k線技術分析、市場定位、SWOT分析後,分析結果分成五類投資者建議,再預測特斯拉基本面喺乜情況下會達到牛市、基本、熊市三種情景,分別給予概率同目標價,提醒投資者需要留意嘅關鍵因素。放一段嘅投資結論原話,大家評評分析得如何:「特斯拉係汽車、技術同能源行業交叉領域嘅獨特投資機會,但現時估值已經消化咗大部分潛力,對新投資者嚟講,風險回報比例比較挑戰性。持股嘅人可以長期持有,新投資者就建議等股價大幅回調先考慮入手。」

　　Manus嘅出現將投資者炒股嘅武器進化到另一個層次。以前啲人炒股,成日都搞啲自欺欺人嘅分析儀式,又要劃線,又要翻譯財報,用excel計算模型,搞到尾又唔知啱唔啱。而家有咁嘅工具就事半功倍。當然,呢啲工具都唔係萬能,最終點樣投資都係要靠自己判斷。畢竟,人人都有AI,但唔係人人都會成為巴菲特。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。