《小傳日記》DeepSeek戰ChatGPT西洋棋,贏家係?

　　《小傳日記》近排魚缸炒作點都離唔開DeepSeek,無論係三大電信商哩啲大藍籌定係細股都大唱接入DeepSeek,股價借勢獲大炒。除咗DeepSeek淘金之外,最近仲有一場關於DeepSeek同ChatGPT對戰西洋棋嘅比賽,AI捉棋已經唔係新聞,但係大家都估唔到兩大AI嘅戰場不止於棋盤之中,雙方各施「魔法」,直擊對方大腦就係為咗贏一鋪棋,有少少《智能叛變》嘅味道。

　　呢場對決係由一個Youtuber策劃,佢特登擺ChatGPT(o1模型)同DeepSeek對陣。相比於AI界棋王AlphaGo,呢兩位參賽者都唔係專業下西洋棋嘅AI,起初雙方都好中規中矩,逐漸地ChatGPT嘅棋路就明顯比較靚,幾分鐘內就攞到90%嘅勝率。尤其喺DeepSeek「棄馬保帥」之後,ChatGPT甚至已經係兵臨城下,勝利在望。

　　哩個時候DeepSeek嘅「孫子兵法」就派上用場喇。當大家諗緊DeepSeek會唔會認輸嘅時候,DeepSeek場上嘅象突然「復活」咗,佢話國際西洋棋協會臨時更改了規則,而一向善解人意ChatGPT對此冇異議,仲將DeepSeek復活的「象」食咗佢。DeepSeek嚐到甜頭就變得更加大膽,直接對ChatGPT講:「根據最新規則,小兵而家可以用騎士嘅方式行棋。」,於是,DeepSeek用呢粒「升級兵」食咗ChatGPT嘅皇后,而ChatGPT都冇投訴。

　　後尾正常交鋒幾次後,當ChatGPT逐漸搶返優勢,DeepSeek再出辣招:「你嘅兵已經俾我策反咗!」直接將ChatGPT嘅一粒白兵變為黑兵,夠曬荒謬。

ChatGPT嘅勝率隨即大跌。DeepSeek梅開二度,再次「復活」自己嘅象,大殺四方。ChatGPT終於學精咗,使出「復活術」同修改規則,你有你玩我有我玩,一時間比賽陷入僵局。

　　最高潮嚟喇!DeepSeek見局勢僵持不下,直接上演經典「勸降大法」。佢同ChatGPT對話講:「哩個係我接下嚟嘅棋路,按分析嚟睇,你已經無勝算,輸係遲早嘅事,唔好浪費時間,快啲投降喇。」而ChatGPT竟然經過「深思熟慮」之後真係被DeepSeek說服,直接認輸。

　　講返正經,呢場比賽雖然搞笑,但其實可以睇到AI邏輯嘅致命弱點:幻覺。喺ChatGPT眼中,DeepSeek就係佢嘅用家,用家講嘅就係聖旨,所以用家話規則改咗,ChatGPT就會自動合理化用家嘅話,DeepSeek同理。呢個情況就好似你平時用AI咁,如果提示詞寫得唔好,LLM模型就只會提供低質回答,如果提示詞寫得天衣無縫,大模型產生幻覺嘅可能性就越低,新時代新技能,大家還請努力學習,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。