《小傳日記》散戶湧入就係散水之時?A股跌得及時新人唔使舐嘢?

　　《小傳日記》內地樓市向來有「金九銀十」嘅講法,即係話9月成交最旺,10月次之。港股喺啱啱過去嘅9月份升咗3000點,雖然10月第一個星期都唔錯,頭四個交易日都有近2000點進帳。本來諗住可以用「金九銀十」來形容港股,點知來到第二個星期就陰溝翻船,昨日(8日)恒指一次過將10月頭升幅全部回吐,仲要嘔凸。今日大市反彈無力,結果難逃跌市厄運,收市再跌289點。成個10月仲有咁耐,埋單可唔可以升暫時言之過早,但要好似9月咁升3000點似乎有啲難度。

　　自從9月24日人行降準,並陸續推出一系列扶持樓市,刺激經濟措施以來,中港兩地股市迎來海嘯級升浪。趁住內地國慶黃金周,港股偷步再挾上近2000點。搞到小散戶眼光光,唔知追唔追好。要追股價已經升咗咁多,唔追呢,股市繼續日日升,再升多啲就更追唔切。如果7號嗰日接貨,相信而家後悔莫及,但都無辦法,政策市一向最睇唔通,何況政策市之餘仲要爆升爆跌。唔怪至得好多人話港股A股化,好難擺脫「武則天守寡」呢個定律。

　　有人話,港股回跌早有先兆。除咗股市升勢過急之外,內地黃金周假期,新開證券賬戶數量按年急升1.5倍,顯示升市已經吸引一批新人進場,當新人湧入之時,就係股市「散水」嘅時候。根據開戶程序,該批新開股票帳戶最快可以喺今日進行首次交易。可能擔心班新人入市即坐艇。昨晚,內地五大券商:中信證券、國信證券、國金證券、中金財富證券、廣發證券就喺新股民入市之前,苦口婆心勸新入市投資者話「唔使急!要有明確投資目標,唔好抱住搵快錢嘅心態入市,要做有紀律嘅投資,唔係情緒嘅投資;要做好資金規劃,用閒錢投資,唔好孤注一擲,唔好畀投資反噬自己嘅生活」咁話。不過,假如個市好似國慶假期前(9月30日)升得咁癲,唔知投資者又聽唔聽得入耳?

　　A股兩市今日大跌,上證綜合指數收跌6.6%,深圳成份指數更插水8.2%。對班新人來講唔知好唔好彩,不過,只要唔係今早開市就買貨,應該可以避過一劫。見到爆升又見到爆跌

,幫呢班雄心壯志要喺股市賺大錢嘅新人上咗寶貴嘅一課,比起五大券商苦口婆心忠告可能更有效。

　　其實早喺9月尾中港股市進入「失去李治(理智)」之前,筆者就聽到一啲內地股民喺網上呻股票難賺錢。唔知今次早前爆升會唔會改變呢批股民嘅諗法?其實,無論A股還是港股,如果要同世界接軌,做國際金融中心,就要想辦法吸引外資長期留喺度。既然內地經濟長期有高增長,市場又咁大,無理由股市長期積弱,要靠政策來推動股市。而且,用政策推動嘅股市,既不持久,亦非良策,最傷嘅往往係小散戶。希望日後中港股市可以有序前進,唔再靠政策炒作,爆升爆跌。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。