《小傳日記》羽毛球價飆升,月薪2萬都打唔起,李寧股價起冇起?

　　《小傳日記》今日內地公布嘅6月居民消費價格指數(CPI)按月跌0.2%,顯示內需仍然疲弱。內地去年復常後,零售銷售一直無甚起色。大部分物價升幅有限,甚至不升反跌。樓價平咗、車價平咗;冰杯減至1蚊人仔,就連樽裝水都平咗,聽講最平樽裝水低至8毫子人仔有交易。樣樣都咁平,唔怪得愈來愈多港人北上消費,享受低價產品同服務。

　　不過,講到內地物價樣樣都平,似乎有啲言過其實。日前就有一篇名為「月薪2萬打唔起羽毛球了」嘅文章,顛覆咗大家對內地物價嘅想象。綜合多家內媒報道,今年上半年,內地幾家主要羽毛球供應商多次上調羽毛球價格,平均升幅達三成,部分型號升幅更高達五成。以知名品牌「翁尼斯」主流高端款AS-05羽毛球為例,4個月前每打價格210人仔,到7月已經賣到275人仔,四個月升咗30%。

　　唔單止羽毛球加價,仲成日出現缺貨嘅情況。有記者近日查詢時發現,以上述名牌為例,京東自營店6款羽毛球全部售罄;而天貓旗艦店只有三款,其中一款係比賽用超高價羽毛球,唔係普通羽毛球愛好者用開嘅型號。唔少羽毛球運動愛好者大吐苦水,話羽毛球價愈來愈貴,而家已經成為貴族運動。

　　造成羽毛球價格節節上升嘅原因,係內地鴨、鵝出欄量喺2019年達到巔峰嘅48.8億隻同6.3億隻後,近年出欄量有所下降。但同時羽毛球卻愈來愈普及,根據國家體育總局數據,羽毛球係中國最普及嘅運動,參與人數高達2.5億。喺供應減少、需求上升嘅情況下,造成今年羽毛球價大幅上升。

　　眾所周知,李寧(02331-HK)一向有做羽毛球運動用品,特別係羽毛球拍同球衣,可以話係羽毛球壇嘅名牌象徵。至於羽毛球,李寧嘅知名度唔係咁高,甚至好多人都唔知佢地有做羽毛球。所以,呢一波羽毛球價格升浪,預計李寧得益唔多,所以股價近期低處未算低,今日仲要跌近1.5%,收報14.82銀,試緊今年1月22日個低位,想揾個炒作嘅藉口都無。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。