《小傳日記》美斯拂袖而去,全城狂嗌回水!分分鐘日本都唔去?
經濟通新聞 2024-02-05 17:10
《小傳日記》幾叉嘢可以獲得球王陪睇波!美斯來港由全城熱話一日之內變成全城熱罵,街頭巷尾今日最熱話題都係美斯唔落場,行出街都一定聽到有人講緊。
唔計黃牛飛,今次由Tatler主辦嘅表演賽每張飛都已經超貴,最平一張880銀,之後仲有1580銀、2280銀、2980銀,甚至4880銀,最平一張已經接近平時一場演唱會最貴級別,難怪入場觀眾肉赤到當面大嗌回水。以門票中位數2280銀計,大球場40000人,若全數售出,單計票價已經實收超過9000萬銀,連同早一日禮拜六嘅公開操練門票,主辦方實收過億銀!
定價咁進取,皆因主辦方Tatler本身就係一間奢華時尚雜誌,專報道上流社會生活,所以今次嘅表演賽門票定價都係咁上下「奢華」。原本都無人識,今鑊之後就人人都識,貼地到被人煎喺地下嚟問責。
事實上早一日操練,已經見到美斯喺場上要訓喺草地按摩,狀態已經有暗湧,但係都未有話第二日完全唔可以落場,不過到第二日正式,美斯全程衫都無換,結果全場只做塘邊鶴,全場觀眾噓爆之時,美斯就神情灰溜溜咁返入更衣室。
呢場表演賽以美斯做賣點,入得場都係睇美斯,有網民就話,如果唔係百分百貨保證見到美斯,就應該要講明,結果就無落場,黃牛級價錢嘅飛錢好似白畀咁。事後足總率先割席,話主辦
方係Tatler,自己只係協辦。而政府都先後出兩次聲明表達失望,今日晏晝更加由文體旅局局長楊潤雄出嚟交代,提到表演賽期間已經多次向Tatler方面追問美斯幾時出場,直到半場都仲話下半場會落場,到完場前十分鐘先確認唔會落場。
原來當初簽約已經有寫明美斯至少要落場45分鐘,除非因為受傷,但如今都係因傷缺陣,好難話佢係違約。事後Tatler喺IG出咗聲明之後,今日總部就閉關一天避難,講明聽日先會蒲頭,不過IG就已經被「回水」洗板。至於美斯同國際邁阿密班主碧咸嘅IG都同樣被洗板,甚至出現唔少中文comment問佢哋點解要咁做。
原定今日下晝嘅參觀都取消咗,最新有消息傳緊有可能國際邁阿密會取消下一站嘅日本,直接完結今次嘅亞洲之旅。咁比起香港,日本一早就知好夢落空,香港觀眾畀足錢入場坐足咁耐,愈希望反而就愈失望,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
- 變局來臨!我們該如何布局自己的投資策略?
- 掌握全球財經資訊點我下載APP
文章標籤
上一篇
下一篇