《小傳日記》萬科搞大會定軍心,國企背景硬淨好難冧?

　　《小傳日記》今日都算係港股嘅「小奇蹟日」,雖然升得300幾點,不過就係8月以來第一次企穩50天線以上收市,朝早仲曾經上過18000點,成交都過到千億,50天線暫時應該都會阻力變支持。

　　其中一個利好因素當然就係內房消息。萬科(02202)過去幾星期遭遇股債雙殺,有好多隻美元債都大跌,而過去好多房企諸如恒大(03333)、碧桂園(02007)就爆煲前都會出現債價大跌,於是孖屐就擔心劇本會喺萬科身上重演,令股價跌到去差唔多7年半以來新低。

　　為此萬科今日就準備咗一場金融機構溝通會議,孖屐就解讀為穩定情緒同市況嘅招數,令萬科今日股債雙長。事實上,萬科最大股東係深圳地鐵集團,而深鐵就係不折不扣嘅國企,所以萬科實際上就係具國企背景嘅民企。而萬科呢場會,除咗會有超過150間中外金融機構參與,最令孖屐振奮莫過於係會有深圳國資委人員出席,真正係國家護航嘅味道。

　　其實萬科一起步已經具有國企背景;2000年以前,萬科最大股東一直都係深圳經濟特區發展(集團)公司(現稱特發集團),係廣東省委1981年決定成立。去到2000年以後,華潤集團取代成為期科最大股東。不過咁都未係萬科背靠國企嘅最終目標,2015年寶能集團大幅增持萬科,到嗰年8月,寶能持股超過15%仲一度超越埋華潤集團成為最大單一股東。經過一輪增持戰之後,到2016年3月,萬科停牌並宣布引入深鐵作為「白武士」,配新股後深鐵當時就持有20.65%嘅萬科股份。再到2017年,深鐵再以合共超過663億人仔收購華潤同恒大手持股份,先結束呢輪增持戰。

　　至今深鐵總共持有27.18%總股本,仲係萬科最大股東,而萬科亦係深鐵旗下為數不多嘅房地產公司。所以,咁重國企背景嘅萬科根本好難好似其餘民企咁,有咩事都仲會有國資委100%持股嘅深鐵撐腰,而呢場會當然就係要再次強調呢一點啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。