《小傳日記》福士入股救小鵬?定係福士再唔出手就跌落神壇?

　　《小傳日記》小鵬(09868)7月初以來橫行,終於等到正式公布福士入股消息,今日即刻暴升咗三成三!小鵬老闆何小鵬就貼出同福士中國CEO　Ralf　Brandstaetter嘅合照,話多謝Ralf同福士嘅信任,期待「大(眾)」和「小(鵬)」嘅攜手,可以將最好嘅技術、產品、品牌帶到全球咁話。

　　雖然牌面上睇福士咁大牌子,入股係畀小鵬好牌來上,不過其實福士都有依賴小鵬嘅需要。

福士都已經唔係第一次同神州牌子合作,旗下Audi早就同咗上汽合作推出電動車。不斷要同神州牌子合作,實際上因為單係福士牌頭嘅電動車,真係賣得唔夠好。福士旗下ID系列,ID.3喺2021年推出以來,一個月最多都係試過賣4611架,今年成個上半年都只係得13665架,以大牌子來講真係算少。

　　而福士身為傳統油車公司,研發電動車技術正正處喺尷尬位置,既未及BYD(01211),但又比起造車新勢力有錢。既然係咁,不如收購人哋嘅技術。而家福士就話,預計將會同小鵬合作兩款電動車,預計2026年開售,到時就會以福士牌頭來賣,即係「福士皮、小鵬餡」。

　　所以,兩間公司合作其實係互救,今次合作都證明咗,神州電車市場競爭激烈,如果要打大佬,唔合作都唔得,而今次合作,都算係睇到神州電車市場未來有可能嘅發展方向,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。