《小傳日記》藥師幫係「乜乜第一股」?抽完會唔會做LuLu?

　　《小傳日記》魚缸近期好似回返氣,大市成交噚日開始上返1200億銀,今日仲有成1700幾億銀,過完美國議息,唔少之前眼望望唔敢入嘅錢都開始回流,睇嚟魚缸仲有得上!

　　就快半年結,睇返呢半年走勢其實同上年其實差唔多,幅度細少少,不過整體都係向淡居多。不過疫情過去,都有唔少新股肯搞IPO,至今已經有26隻新股完成IPO,比起舊年同期

得16隻都多唔少。不過以集資額計就反而少咗,今年得130.6億銀,但係反而上年上半年就有141.94億銀。

　　而早兩日就又有隻藥師幫(09885)開始招緊股。藥師幫會發行大約1580萬股,其中大約九成係國際配售,一成係公開發售,招股價介乎19至23銀,集資規模最多3.63億銀,每手200股,入場費4646.39銀。

　　有評論就話,藥師幫上市之後會成為「院外醫藥產業互聯第一股」。近期好多中資公司上市都好鍾意嗌自己做「乜乜第一股」,不過上市之後表現又唔係標青過人,所以通常呢類「第一股」都唔係特別馨香。而藥師幫其實都係做網上醫藥服務銷售,其實就同阿里健康(00241)同京東健康(06618)一樣係網醫股。

　　不過有少少唔同就係,阿里健康同京東健康主要係直接面向消費者層面,而藥師幫就係做B2B生意,即係以批發形式,做藥企同零售藥房嘅中間商。藥師幫自己就話,公司開發咗以技術為後盾嘅解決方案,連接上游(包括藥企及經銷商)同下游(包括藥店及基層醫療機構)。嚴格來講的確係同現有網醫股唔同,藥師幫更大程度上可以話係醫藥供應鏈嘅持份者,不過炒起上來,走勢應該都同網醫板塊差唔多,往後表現就要睇自己業績做得靚唔靚,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。