《小傳日記》「牽手門」碎花裙大熱!賣得多又退得多要倒蝕?

　　《小傳日記》呢幾日神州網上最熱爆話題,當然就係中石油旗下寰球工程「胡總與小三」嘅「牽手門」事件,「胡總」自己已經被免職,而被傳係「小三」嘅董思槿就只係停職。

　　不過呢幾日以來隨著事件發酵,加上董小姐本身都唔係低調嘅人,愈來愈多相關花生料爆出。呢幾日爆嘅料都偏向「洗白」,疑似董小姐自己背景比起胡總更加硬!有傳董小姐阿爸以前就係國家重點裁培對象,去過日本留下學,回國之後都身居要職。董小姐可以話本身就根正苗紅,曾經去過美國留學,回國就讀中石大(北京),畢業之後就加入中石油集團,雖然少不了背景支持,不過都算讀到吓書,最少都唔只係花瓶,所以有網民就話,今次根本就唔係「胡總與小三」,而係「白富美與她的老baby」。仲有網民爆料董小姐一向都情傾「成熟男士」,對上一任男朋友都係大自己十幾年!

　　回顧返「牽手門」,當中最搶眼莫過於董小姐一條桃紅色碎花長裙,春夏之際天氣悶熱,感覺格外清新,所以先吸引攝影師幫佢哋做街拍。事後除咗董小姐成為熱搜,連條裙到一夜爆紅。

　　不過之後就問題多多,其中一位主理人「的蒙」提到,6000幾張單入面,有2000幾張出貨前就已經退貨,可能有人都只係志在訂完cap張圖就退,又可能有人著完打咭就趁48小時內再退貨,「的蒙」預計最後只會有1300條左右係真正成交。另外,本身條裙都唔算平價,都要600幾銀人仔,所以即刻已經有海量山寨平貨湧現,禁都禁唔住。

　　目前只係事發幾日,相信最少都仲要講多一至兩星期,會發酵到幾大都未知,不過最少條裙都仲係大賣當中,銷情比起魚缸更熱鬧,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。