《小傳日記》市傳阿里商湯推出大模型,AI概念勢成下周焦點!

　　《小傳日記》「清明時節雨紛紛」之後,魚缸今日一如所料,悶!畢竟聽日就係復活節假期,好多人仲holiday　mood緊,仲未回魂呀!

　　喺呢個咁悶嘅氣氛當中,總要搵啲嘢炒下嘅,講緊AI概念呀。市傳阿里(09988)會喺下星期二(11日)阿里雲峰會推出大模型,並且喺18日推出行業應用類模型,往後亦將有

各類行業應用類模型會面世。有網民忍唔住喺網上po片,提到阿里嘅「類ChatGPT」語音助手。影片可以見到,呢個語音助手可以模仿音調、語氣同文本風格,與用家傾偈同互動。

　　據報,天貓精靈團隊通過15日層次化嘅訓練方式,得到嗰位網民嘅聲音,並通過音箱端接入阿里大模型。對話視頻中,喺語速、情緒同文本風格都同網民好似,而且有較強邏輯性。不過,語音助手仲處於測試階段,仲有部分問題,答案比較冗長,亦只係部分支持英文問答。

　　另外,據報商湯(00020)下星期會推出大型AI模型,「孖屐」估緊商湯準備緊推出一款產品,挑戰ChatGPT。報道引述招銀國際分析師收到嘅邀請,指商湯會喺4月10日發布大型模型,產品可能同AI生成內容有關,而管理層上星期喺業績公告中都提到呢一點。報道又引述商湯代表稱,公司好快會發出媒體活動邀請,但未提供更多細節。

　　無獨有偶,中國廣播電視網絡集團喺微信公眾號po文,指近日召開大模型人工智能技術與應用專題研討會。會議要求強化先進技術應用支撐,加快打造智慧廣電「算網大腦」,建設融合業務平台,更好實現「有線+5G」全業務運營。有埋傳媒幫手放風,AI概念好大機會成為下星期嘅焦點喇!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。