《小傳日記》據報百度將發布文心一言,準備抗衡ChatGPT?

　　《小傳日記》百度(09888)宣布推出AI聊天機械人「文心一言」(ERNIE　Bot),好受「孖屐」關注,股價曾經一日內升超過15巴仙。據報,百度打算喺下星期四(16日)召開新聞發布會,發布「文心一言」。不過有外電引述消息指,依家「文心一言」嘅一啲基本功能仲未搞好。

　　消息人士透露,為咗開發「文心一言」,幾百位員工一直日以繼夜、夜以繼日做嘢,其他團隊亦被要求就人手同計算機晶片作出支援,總動員咁濟呀。不過,喺預定發布日期之前,「文心一言」嘅AI模型仲接受緊數據訓練。部分員工話,佢哋唔夠時間打造一款功能完善嘅產品。

　　報道又指,「文心一言」可能係中國第一個抗衡美國ChatGPT嘅產品,所以呢個AI聊天機械人嘅計劃獲得北京市政府官員嘅鼓勵。官員亦提醒百度,要確保服務遵守法律法規,包括數據收集同處理規定,以及嚴格嘅互聯網審查規則。

　　雖然未必咁快有實際嘅內容出嚟,但「文心一言」一出,AI概念股即刻炒到瘋癲,畢竟呢樣嘢實在為人類帶嚟好大便利,亦可以開拓好多商機。既然ChatGPT一出已經咁受歡迎,百度本身亦有比較完善嘅技術支援,而內地市場咁大,「文心一言」相信會好快爆紅。不過,始終呢種科技背後涉及唔少資料同數據,百度的確小心處理先得喇,以免違反規則惹禍上身呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。