《小傳日記》比亞迪傳聞滿天飛,係得股價唔識飛!

　　《小傳日記》恒指今朝終於都失守咗20000,然後全日都上演好淡雙方爭持,都肯定唔到20000一定會收得住。

　　呢排就係魚缸放榜期,呢段期間主要就係炒吓啲業績股,譬如理想(02015)今日收市後出業績,全部車股跌緊,不過理想就逆市造好。至於一樣係車股嘅BYD(01211),今日同樣係傳聞多多。

　　首先就係傳要減價。之前先啱啱加完價,今日就有傳王朝系列嘅舊款車就要開始減價,上海同深圳等等都有唔同程度嘅減價,舊款車型都減超過一萬銀人仔!有內媒就訪問到一間喺北京嘅王朝展覽廳sales,啱啱收到官方柯打將唔唔同車款減價,例如2021年漢EV減兩萬銀人仔,2021年秦EV減1.5萬銀人仔。加完無耐就減嘅消息令BYD今朝低開超過1巴仙,隨後孖屐就借勢沽落去,最多仲要跌5巴仙。另外又有傳,BYD將會推出專業個性化全新品牌,內部代號為「F品牌」,據報流出嘅會議紀錄仲提到,「F品牌」會係長城(02333)坦克300類似嘅越野車。

　　BYD會喺3月底公布全年業績,仲有成個月就已經傳聞滿天飛,就此BYD就一次過澄清,首先就承認的確係有一款個性化全新品牌「F品牌」,都係今年內會登場,但就唔係類似長城坦克300咁樣,一切之後會再公布。另外,比亞迪方面從來都無法下達減價指令,有減價只係個別地區經銷商嘅促銷活動,BYD官方都冇減價考慮。

　　近期炒開業績股,業績前都零舍多呢啲傳聞流出,當然都係有呢啲配料先炒得起,譬如今日都係借勢沽緊BYD落去,創成個半月新低,唔沽低啲又邊有得買?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。