《小傳日記》恒大出家書當周年報告,不過都係純粹報到!

　　《小傳日記》恒大(03333)停牌都就快差唔多成年,上年一來因為交唔切2021年全年業績,加上已經開始開債權人會議傾重組,所以上年3月開始停牌。

　　不過停牌之後恒大都仲有繼續運作,新一年開始,許家印就久違地出咗封「家書」嚟報告一吓過去呢年恒大做咗啲咩嚟。正路叫得「家書」,應該都係寫畀自己恒大人先係家書,不過通常呢類自稱家書嘅文章,最後通常都預咗收「家書」嘅「家人」會流出去所有人睇到。

　　「家書」就提到,恒大732個項目都因應保交樓而全面復工,全年一共成功交樓30.1萬間;好早出現爛尾傳聞嘅海南海花島都可以穩步運營,計落已經接待760人次。另外恒馳都係許家印講到嘅重點,今年內已經開始交車同埋量產,好似樣樣都上緊軌道。

　　回顧完都有展望,同阿爺對內房嘅期望一樣,許家印都話2023年係恒大「履行企業主體責任、千方百計保交樓的關鍵年」,相信全體員工繼續努力,一定可以完成保交樓任務。

　　不過講咗成篇都係無提到重組成點,搞咗差唔多成年,斷估唔會無嘢做到卦,結果又只係得篇刷存在感嘅家書。孖屐最想知嘅重組又或者係幾時復牌又無提到,結果就係又要繼續等囉,都等咗成年,繼續等囉,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。