《小傳日記》寒冬來襲影響供電?貴州電網已要求鋁廠減產!

　　《小傳日記》就嚟到聖誕節,天氣愈嚟愈凍,大家出街要著多幾件衫呀!

　　隨住寒冬來襲,電力供應成為其中一個焦點。近年內地多個省市喺冬季都會有電力緊張嘅問題,最嚴重要數到前年,全國多地都出現拉閘限電、工業生產停擺、高層建築電梯全停等情況。

　　貴州電網近日發布通知,話自11月底以嚟全省氣溫驟降,用電量迅速攀升,受高熱值煤不足影響,喺電力外送降到最低水平嘅情況下,當前水電蓄能已經逼近「安全底線」,嚴重危及電

網安全運行,存在大面積拉閘限電嘅風險。貴州電網已經要求遵義鋁業等公司減負荷20%,通過5日負荷管理執行到位,各電解鋁企業亦暫時按70萬千瓦總規模調減。

　　到咗冬天,無論工廠定民居嘅用電需求都會提高,貴州電網已經叫定工廠用少啲電。不過,因為氣候變化愈嚟愈大,今個夏天熱浪已經影響內地多個省市一段時間,拉閘限電嘅情況過咗一排先有好轉。如果今個冬天氣溫再凍啲,即使各地電網做足防備措施,都未必頂得住咁極端嘅天氣,用電情況可能會非常緊張。

　　如果今個冬季持續拉閘限電,對煤炭股有著數。睇番兗礦(01171)近日走勢都幾硬淨,仲未跌穿10天線同20天線。趁今個冬天,大家不妨買啲煤炭股取下暖呀!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。