《小傳日記》網約車鬥快上市,食住復甦個勢無得遲!

　　《小傳日記》魚缸呢兩日上落都幾大,噚日玩完急跌900點,今日就愈升愈有,晏晝拉開最多升700幾點,差唔多都補返曬噚日嘅跌幅。

　　據《彭博》報道,廣汽(02238)旗下網約車品牌如祺出行正係準備來香江上市,據報已經搵咗農銀、中金同華泰嚟幫手做IPO,最快下年就敲鑼,會集資幾億銀美金,但係而家十劃都未有一撇,而相關嘅投行都不予置評。其實之前仲有隻吉利(00175)旗下嘅曹操出行準備緊IPO,傳最快4月就會殺到,集資規模大約都係幾億美金。

　　自從網約車龍頭滴滴出行出事之後,再到滴滴由花旗國退市,網約車孖屐熱度都cool　down唔少,如果下年呢兩隻有強大阿媽十卜嘅網約車股上市,好大機會可以再刺激板塊熱度。而呢批網約車忽然咁急住上市,好明顯都同神州逐步復常有關。如果繼續三不五時都封控,仲有邊個會出行?

　　如今放寬愈來愈多,預期人流活動增加,呢類網約車業績都應該會跟住上,尤其封控期間可想而知網約車業績一定非常麻麻,放寬防控之後網約車業績按年可能都會翻兩番,所以而家網約

車當然要揸緊時機食住個勢。同時最重要,就係趁滴滴未完全翻身之際搶佢嘅「孖屐些牙」,話唔定可以趁機改朝換代,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。