《小傳日記》減持都是一種愛,高管話股神對BYD仍然有愛!

　　《小傳日記》魚缸今日上演恐怖急跌!雖然成個上晝都算係反覆,不過都算係正常波幅之內。但係一點半之後,成個市忽然愈跌愈深,由重磅藍戰士開始跌起,之後成板藍戰士都翻轉,恒指由全日最高見19737,兩個鐘內失控暴跌落18799,夾埋成937點,仲跌穿埋萬九關!

　　講波動嚟講,比亞迪(01211)都係令人又愛又恨,雖然以走勢嚟睇非常靚仔,不過股神減持因素長期都困擾住佢,所以明明消息面利好都好難升,始終唔知邊日又會公布減持。

　　不過面對住被減持,BYD方面就好似唔當係一回事。噚日BYD執行副總裁李柯接受《彭博》訪問嗰陣就話,就算股神不斷減持BYD,都仍然「熱愛」比亞迪,「熱愛比亞迪團隊」,「永遠都係比亞迪最大支持者」。

　　今朝BYD最多都升成6巴仙有多,咁當然都唔止係呢句,李柯同時喺個訪問提到,正係傾緊想買智利鋰礦嘅開採權,呢個亦都係助長升幅嘅一大因素。講返股神,雖然李柯咁熱情表達覺

得同股神關係良好,不過照咁睇股神都係keep住沽緊BYD,點都唔似李柯講到咁熱愛啦!

　　目前睇BYD個價keep住受壓,但係可以見到每次股神出貨之後,孖屐反應都開始無咁大,唔知會唔會有一日孖屐會完全消化曬減持嘅利淡影響,不過BYD基本面贏通同行,股價見

到最盡160銀都跌唔落,相信影響都有可能會逐漸減細,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。