《小傳日記》騰訊績前由跌轉升，大行估新業務表現吸睛？

　　《小傳日記》今個星期係重磅科技股嘅業績公布期，好多缸友好關心佢哋表現成點。當中，今日收市之後公布季績嘅騰訊（００７００），股價早段曾經跌超過２巴仙，但最後都可以升住咁收市。

　　「孖屐」預期，由於騰訊第三季唔夠遊戲版號上榜，廣告業務亦受到外圍經濟拖累，第三季經調整盈利（非國際財務報告準則）會繼續下滑，但跌幅估計較上一季嘅１７％收窄，表現應該好過之前。

　　騰訊最近有傳開始新一輪裁員，涉及六個業務部門中嘅三個，影響視頻、遊戲同雲業務。不過，暫時未知今次裁員嘅規模有幾大，而騰訊亦拒絕回應有關傳聞。事實上，騰訊８月嘅時候曾經披露，公司員工人數由３月的約１１﹒６萬人降到６月底約１１﹒１萬人。不過，騰訊近年嚟嘅增長的確有啲放緩，裁員相信係其中一個方法，減少公司嘅開支，並且可以營運得更好。

　　另外，唔少大行預期，騰訊嘅新業務「視頻號」發展唔錯，估計未來會貢獻部分廣告收入佔比，有望成為公司近期最可以預見嘅增長動力。

　　裁員有望節流，「視頻號」有望開源，而阿爺監管措施嘅最壞時間相信已經過去，騰訊亦逐步適應新監管嘅環境，呢到未必再加重對公司嘅傷害。睇下嚟緊騰訊可唔可以透過開源節流措施，虧損減少之餘，仲可以重現增長動力喇！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。