《小傳日記》唔列入帶量採購，微創連升四日都未夠喉！

　　《小傳日記》講咗咁耐二十大終於開場，不過天氣不似預期，風向暫時都係動態清零，即係同開幕前一樣，結果魚缸都係淡淡靜，係間唔中有些少波幅，尤其今日尾市拉升，臨尾拗腰倒升返。

　　而今日最勁都仲係炒緊醫藥股，不過嚴格嚟講係醫療股，微創（００８５３）今日再升一成一，累計連升４日，飆高三成一有多，扒返文原來咁高興係因為阿爺再次強調創新醫療器械暫時都唔會做帶量採購。

　　國家醫保局就講到，而家帶量採購嘅重點將部分會係臨床用量大、使用成熟、採購費貴同埋市場競爭充分嘅醫藥用品先係納入，但係例如３Ｄ打印產品仲屬於初創階段，而且仲有時需要個性化訂製，成本同功效未算係批量生產嘅程度，所以目前都會畀企業自主決定係咪參加帶量採購。

　　一般嚟講，帶量採購係阿爺穩定醫療市場嘅招數，都唔一定可以畀醫療公司自行決定參唔參加，由阿爺大批ｂｕｌｋ　ｐｕｒｃｈａｓｅ，緊急時就用返穩定價格放出嚟，就好似醫藥品庫存咁。而參加咗嘅公司可以有穩定客源，但係就提價空間唔多，所以通常被納入帶量採購名單都唔算係好消息。而今次創新醫療器械唔使被帶量採購，變相器械議價空間更加大，所以主力做醫療用品嘅微創先會爆升三成。

　　而上面一直堅持動態清零，其中一點就係意識到目前嘅醫療系統唔算得係標青，所以追求更好嘅醫療質素都可以算係一個大方向。不過任何事都唔可以過熱，有朝一日定價太高，有可能帶量採購就會包括埋醫療器械，總知都要睇時機，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。