《小傳日記》鮑威爾同侵侵「喜相逢」,聯儲主席寶座坐唔坐得穩?

　　《小傳日記》全球矚目嘅美國大選結果終於出爐,再度「侵」入白宮,全地球Trump　trade噚日起落實上馬,「股匯油金幣」馬上有反應,全球政經風雲變色,而今次侵侵2.0注定係全面升級版,全員歸邊嘅共和黨,仲要控制住參議院,可想而知侵侵要推咩政策,都唔會遇到太大阻力。神州方面如臨大敵,大家都驚阿侵會點樣再出奇招,而震嘅當然唔止得神州,相信美聯儲局主席鮑威爾都要嚇出一身冷汗。

　　今晚就輪到美聯儲局宣布議息結果,普遍都預期今次會減息0.25厘,都十之八九啦。由以前炒減息結果,都而家已經係炒減息預期,所以會「鮑神」總結會後聲明講兩句,加埋幅點陣圖,反而先係市場焦點。

　　眾所周知鮑威爾同特朗普唔係幾啱牙,當年特朗普做緊總統嗰陣,就已經成日吟噚美聯儲局嘅決策,仲經常當眾批評鮑威爾,仲試過想打算要換走佢,好在後來特朗普敗走白宮,鮑威爾呢幾年都坐得尚算安穩。

　　特朗普過去四年由安坐白宮變成在野狙擊,但期間連珠炮發從未停過,今年8月又再批評鮑威爾決策上「一係太早一係太遲」,噚日過後特朗普即將再次成為白宮之主,話唔定換走鮑威爾嘅諗法會再度回歸。鮑威爾今屆任期會喺2026年5月完結,話唔定就係特朗普踢走佢嘅好時機。當然,美聯儲局都有確保自己獨立性嘅保護機制,譬如要經過參議院確認以及國會委員會嚟決定美聯儲局理事嘅任命等等,都唔係特朗普一句唔鍾意就換。而特朗普早排都講過,唔認為自己能夠命令美聯儲局點做,但就認為自己有權可以對利率方向表達意見,講到尾都係唔可以唔畀自己講嘢。

　　都有好多分析認為,特朗普回歸之後將會令到美聯儲局嘅貨幣政策更加難行,除咗阿侵會成日阿吱阿咗,佢嘅上任意味通脹可能未必減得咁快,因為佢一上任就有可能大搞經濟措施,而且推行方法仲係至高無上嘅行政命令,又快又急之下可能會同美聯儲局慢慢減息嘅策略大為唔同,結果就係通脹回升,所以就解釋到點解阿侵一直都想換走慢郎中嘅鮑威爾。

　　聽日就係「鮑神」主場,市傳佢會後記者會句開場白就係今日「鷹」定「鴿」嘅暗號,「Good　afternoon」就係利淡,「Hello　everyone」就係利好,但冤家又再上台,唔知仲有無力「Hello　everyone」呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。