《小傳日記》一篇假文炒起「四川概念」!茶百道變妖好無辜

　　《小傳日記》幾次失望嘅記者會之後,救股市的功勞又落喺「央媽」身上。人行行長潘功勝今朝出席論壇就預告,下個禮拜LPR「可能」會一次過減20至25點子,加上此前多項振市措施正式落地,魚缸下晝終於發力,一路最多升超過800幾點,成交都終於按日回升。乜都炒得起,但係前幾兩日炒起嘅茶百道(02555-HK)今日就有陣散水味,升過三成最終又回落得返4%。

　　早兩日上面有傳聞話四川正式開始超過兩萬億嘅拆遷項目,仲有人因為賠償而一夜暴富,當時A場同魚缸都因此而炒起咗全線有關四川、重慶等等嘅「概念股」,而成都起家兼有熊貓做嘜頭嘅茶百道,就食住呢場東風最高炒過上16銀。

　　但時隔兩日成都公安已經火速破案,發現原來有位人兄用AI生成咗呢篇「四川啟動2.15萬億拆遷項目」嘅假文,隨後又有人附亂噏,話「有朋友賠了17套房」,又話「賠了967.43萬」,連實數都有講到似層層,結果就水咗成個孖屐跟著一齊炒。目前始作俑者同幾位亂噏人士都已經被拉,但一眾四川概念股無啦啦就砸咗批蟹貨喺度。

　　成單嘢最瘋狂就係篇假料竟然係用AI生成,仲要入面創意無限,提到「成都要起聯合國總部」、「首都遷移」以及係「迪士尼預留土地」等等。話係佢自己手寫作都仲算有啲心機,但居然AI生成咁無誠意,但又衰在有人信又有人炒,一次過推升茶百道八成,實在係癲。不過今次事件又再一次證明,而家嘅孖屐對消息係幾敏感,茶百道一嘢升上去嗰陣,可能有人連篇文都未睇過就入市,結果即日炒即日吐,唔夠快手可能已經蟹咗。

　　茶百道業務正處於增長期,尤其南韓市場係目前孖屐最關注嘅增長點。據茶百道高麗國市場負責人透露,目前茶百道喺當地本土消費者佔比已超八成,由最初主要係中國留學生幫襯,至今已經完成本土化,有望成為茶飲股出海最佳例子,唔計呢幾日嘅走勢都已經跑贏同行奈雪(02150-HK)唔少。但無端端茶百道急升回吐,搞到走勢「妖」味濃咗咁多,而且經過「假消息之亂」後成地蟹貨等走人,後市走勢方面應該會波動唔少,難買咗啲。錯過今次炒作嘅朋友毋須遺憾,買股票就似買奶茶,下一隻更精彩,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。