《小傳日記》茅台酒加出廠價!買「飛天」版就唔怕假?

　　《小傳日記》「國酒」貴州茅台(滬:600519)噚晚就宣布,由今日起將會上調53度茅台酒出廠價格,包括飛天同五星都會加價20%。貴州茅台就強調,只係針對經銷商嘅出廠價有所提升,而市場指導價都係維持不變,i茅台、直營店同專賣店維持每支1499銀人仔。

　　今次加出廠價嘅係最基本規格嘅「飛天」同「五星」,但其實「飛天」同「五星」又有咩唔同呢?首先係在於價格唔同,「飛天」500ml一支要1499銀人仔,而「五星」

500ml一支就係1489銀人仔,相差10銀人仔。其次就係包裝嘅分別,「飛天」同「五星」係印喺酒樽上商標;「五星」係由金黃色麥穗在外,包圍一個印上紅色五角星嘅圓輪;而「飛天」據講就係取自敦煌壁畫嘅「飛天」神仙形象,由兩位飛天神仙捧住一隻「爵」。

　　雖然包裝唔同,但係兩個酒樽裝嘅係一模一樣嘅酒,一樣係「一年生產,四年貯藏」,只係包裝上有唔同。原來係因為最早以前「飛天」版係主力用來外銷,據講就係因為咁,所以特登用咗當時最代表到中國形象嘅敦煌壁畫來做商標,更加令外國知道茅台係來自中國。

　　不過到咗而家,無論係「飛天」定係「五星」都有做外銷,亦都同樣兩款包裝都有做內銷。

正因為係呢個歷史遺留嘅因素,兩款包裝都仲有生產。而到咗目前,「飛天」嘅外銷比例仍然係多過「五星」好多。而正因為呢個原因,消費者就覺得出口嘅規格一定會好啲,而且包裝、防偽方面都會好啲,所以就會偏向買「飛天」多一啲。

　　至於「飛天」價錢會貴10蚊人仔,並唔係「飛天」真係矜貴好多,而係因為最初註冊「飛天」商標嘅係貴州省糧油進出口公司,每賣一支「飛天」就要畀返一定商標費用,所以就會貴咗10蚊人仔,而「五星」就係貴州茅台自己註冊。

　　講到咁其實買邊支飲落都係一樣,一切只係「面」嘅問題,識飲嘅話一開酒就知真定假,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。