《小傳日記》Naspers又話短期內唔沽貨?你信唔信?

　　《小傳日記》話說騰訊(00700)大股東Naspers係10月19日調動過倉位,高盛持倉單日激增9500萬股,以當天收盤價計算價值約277億港元,分析相信係減持前兆。

　　如果無記錯,係早幾年前開始,Naspers都進行過減持動作,當時都仲話實牙實齒咁講「我地短期內都唔減架啦」(希望無記錯);不過,截至去年6月底,Prosus及Naspers(南非報業集團)宣布,將有序地場內出售所持騰訊股份,所獲資金將支持Prosus及Naspers的股份回購計劃。Naspers其持股比例已降至25.59%,與此同時騰訊都進行Buy　Back動作,騰訊已累計回購金額358億港元。

　　埋單計數,2001年Naspers以3300萬美元收購了騰訊46.5%的股份;2004年6月16日,騰訊正式掛牌上市,當日以4.375港元開盤;去到2021年,騰訊最高市值計,Naspers呢批股份市值高達2800億美元,增長8750倍,仲犀利過巴菲特。不過,大家都覺得Naspers純粹屎佛撞棍,因為間公司除左騰訊批股份值錢之外,都無咩大作為。

　　唔係騰訊最高峰位出貨,而係選擇而家股市最低迷時間套現,操作上確實真係怪怪地。不過,騰訊睇得出增長出現轉角位,特別係長期都以遊戲業務為主要收入,其他業務又未做到主要營收來源,要沽貨都無可口非。

　　講返騰訊,早幾年係小傳已經講過,DOTA類遊戲已經係收割期尾端,而食雞類遊戲又未可以做到大將,所以騰訊應該做遊戲重點轉移,又或者吞拚其他遊戲機構,如果早幾年騰訊高峰市期,如果收購暴雪都仲可以有多十年玩下;不過而家暴雪都成為人地個仔,騰訊係遊戲市場一哥地位可以做幾耐?我估都捱唔到三幾年囉。

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。