《小傳日記》谷成交新提議,黑雨打風照開市,保證到唔出事?

　　《小傳日記》雖則話係無咗北水,不過魚缸成交沒有最少,只有更少,今日仲連500億銀都唔夠,可謂奀之又奀。

　　而為咗谷起魚缸成交量,港府同生發發(00388)都扭過唔少橋出來。最初就好似喺2011年起將交易時間由4個半鐘延長至6個鐘,之後又出咗港股通,今年又推出人民幣櫃台,更加方便北水炒港股。

　　不過港股成交就愈見低下。幾年前魚缸嘅日均成交額都會有1200億、1300億銀左右,如今1000億銀接近1100億銀已經叫多少少,近期就算有北水,都唔係日日都過1000億銀,呢幾日塘水滾塘魚就更加不在話下。

　　於是乎上年下半年開始,港府同生發發就醞釀喺惡劣天氣下維持交易嘅提議。吹咗風大半年,今日據《彭博》報道,財爺辦公室一個負責嘅工作組將會喺幾星期內提交一份可行嘅計劃,最近就設定咗時間表,因為上個月連續兩個星期五休市之後,令到呢個提議更加逼切,所以工作組就加快咗進程,希望可以喺月底《施政報告》入面回應得切。

　　生發發代表向內媒表示,一直都致力於提升魚缸的嘅吸引力,而確保人員安全仍然係最重要嘅考慮因素。近年啲風愈打愈勁,今年就睇得到惡劣天氣係真係可以好惡劣,連黑雨都可以掛足一日。八號波同黑雨下照開市並唔係唔可行,不過配套又準備好未?其中交通同網絡將會係惡劣天氣下開市嘅最大障礙。如果有必要人員要喺期間返工,萬一出現上個月嘅水浸情況又可以點?就算在家工作,網絡又確唔確保得到,都好影響交易嘅流暢程度。相信即使月底《施政報告》提得到,都起碼仲要諮詢一下孖屐先可以落實,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。