《小傳日記》JPEX屢勸不聽,逼到證監出手都唔驚?

　　《小傳日記》證監聯同警方針對JPEX嘅調查仍在進行,除咗林作同陳怡被拉,另外仲有3男3女被捕,不過全部都獲准保釋候查,8個人都涉嫌串謀詐騙。不過而家網民最關心嘅正係「流亡」馬拉嘅莊思敏,雖然警方噚日記者會上話有需要會引渡「逃犯」返來,不過莊思敏一於少理,仲用「笑喊」emoji回應網民質問,一啲都無懼有可能成為「逃犯」。

　　而逞強嘅都唔只莊小姐,仲有JPEX嘅回應都相當唔客氣。對於警方咁高調嘅指控,JPEX就話證監同警方話佢哋已經停運嘅講法係嚴重誹謗,強調平台所有交易功能仍然正常運作,現階段只係配合法例,逐步將理財項目等功能下架。JPEX又話一直都有同證監聯絡,並唔係對方稱從未就申請事宜聯絡,又質疑點解只係針對JPEX平台。

　　其實今次高調拉人之前,證監都已經出過好多警告訊號,譬如早喺成年之前已經將JPEX列入無牌公司及可疑網站名單,去到上個月初都特登再出過一篇聲明,不點名提到有某啲未獲發牌嘅交易平台,訛稱已經同證監提交牌照申請,誤導公眾以為交易平台已經持牌,警告之後有可能會唔發牌畀相關機構。不過據講當呢篇聲明出街之後,JPEX方面嘅宣傳推廣依然如常進行,直頭當證監無到,唔知係咪因為咁就令到證監終於要出手來個下馬威。

　　而今次仲有一個重點,就係8個被捕人士都係以「串謀詐騙」被拉,好多人都疑問點解唔用洗黑錢條例,以至係上年新修訂、反洗錢條例裏面有關虛擬資產相關罪行。有意見就覺得,對於正係鼓勵虛擬資產交易嘅港府來講,雖然有例可依,不過如果開創先例用新例來告JPEX無牌經營,就會令其他所有Crypto交易平台都陷入喺香港無牌經營嘅尷尬位置。而且目前所以有8個被捕人士都唔係JPEX負責人,疑似係唔想太針對Crypto交易平台有關,所以就先拉部分涉案員工,暫時都未有負責人被拉。

　　雖然目前證監同警方將JPEX案定性為「串謀詐騙」,不過目前一直講嘅「12億銀騙局」,有大部分錢都只係砸咗喺JPEX平台入面,並唔係已經被消失咗,所以係咪真係「騙」都仲要睇事態發展同調查,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。