《小傳日記》魚缸下半年大反彈?外資大行對後市有讚有彈!

　　《小傳日記》恒指今年1月尾曾經升到22700,之後走勢唔太對辦,去到5月尾更加試過跌到18044。嚟到6月,恒指唔見有好大起色,不過無損幾間外資同大行對後市嘅信心。

　　法國巴黎銀行發表2023年下半年投資展望,提到投資者對內地經濟期望比較低,若然中央出台刺激政策催化劑明顯,增長訊號強烈,估計下半年股市會大幅反彈。法巴又話,下半年恒指會好過依家,中長線仍然睇好中港股市,而日本股市具有再入市機會。板塊方面,該行估計下半年科技、新能源汽車同保險股有唔錯走勢。

　　另外,渣打提到依家恒指技術走勢疲軟,預期若果無重大刺激政策措施出台,估計恒指會喺萬八到兩萬點水平窄幅徘徊。若然對政策預期有所提升,相信可以升穿兩萬點,但兩萬一會有較大阻力。該行又指,日本股市連續10星期出現外資淨流入,日本股市估值仍然有上調空間,值得睇好。渣打認為重新開放、消費復甦同促增長政策會支持企業盈利增長,並且睇好通訊、非必需消費品行業。

　　花旗都有推測恒指走勢,將今年底目標由兩萬四下調到兩萬二。該行解釋,由於內地經濟較弱,人民幣兌美元弱勢,加上中美關係緊張等因素,預期恒指下半年只會區間上落。催化劑可能嚟自政府支持政策,積極嘅中美對話,同埋某啲行業利潤率上升。個股嚟講,花旗就睇好網易(09999)、周大福(01929)、金沙(01928)、BYD(01211)、申洲(02313)、友邦(01299)同潤燃(01193)。

　　魚缸嚟緊嘅重中之重,莫過於7月底嘅政治局會議。內地好快公布6月嘅CPI,到底中央會點樣因應呢啲經濟數據,推出咩經濟政策,相信好多人期待緊。政策有驚喜都好啲,但萬一同「孖屐」預期有落差,而北水又唔太撐場,魚缸好難有咩突破,即管睇下經濟政策可以為魚缸帶嚟咩變化喇!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。