《小傳日記》BYD唔使淋紅油都夠紅,進軍法國積極向外衝!

　　《小傳日記》呢兩日香江忽然興起潑墨塗鴉,除咗美國領事館被人噴大字之外,BYD(01211)新開嘅幾間show　room都被人潑紅油。今日BYD總代理聯大就話,傷勢較輕嘅灣仔店同尖沙咀店已經完成復修,連埋天水圍4S店都可以繼續運作,可以繼續新車交付同售後服務,但係連道閘都俾人撞爛嘅元朗店就就未整返好道閘,要到今個禮拜尾先可以開返。

　　據聯大方面估計,當年爭代理嘅時候,完全無其他公司一齊爭,所以應該唔會係其他公司眼紅報復。反而就覺得係近期BYD喺香江積極拓展,可能影響其他本地車行,懷疑係其他行家針對BYD,甚至係國產車市場,話被人淋紅油完全係意料之外。

　　近期BYD都好積極打開神州以外市場,除咗TVB台慶出咗架車出嚟抽大獎之外,喺香江都多咗好多曝光率。除咗香江,BYD嘅歐洲市場都係如火如荼,除咗之前傾緊開廠,最近有外媒報道,BYD將會喺法國出5款新車,最快今個月內就會向法國代理商交付第一批車。據講BYD想今年內喺法國開到15至20個銷售點,最終希望單係法國就可以開到100間門市。

　　睇返個價,BYD可以話愈淋紅油就愈紅,今日高見258.4銀,再創2月以來新高,正式企穩255銀阻力水平之上,如果今晚美國CPI唔出意外,就可望挑戰今年高位268銀!所以無論買股定買車,BYD都係唔錯嘅選擇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。