《小傳日記》神舟十六號升空,馬斯克就訪中,有重要嘢要溝通?

　　《小傳日記》神舟十六號今日發射升空,超哥今朝行會前都有祝賀發射成功。而除咗超哥之外,一直渴望上太空玩嘅馬斯克居然都有對神州航天科技畀like。

　　就喺今日,前加拿大航天局太空人share咗神州CGTN有關探月工程嘅post,中國探月工程總設計師吳偉仁話,到2030年中國人一定能夠踏上月球,於是馬斯克就喺下面留言話「中國嘅太空工程比好多人所想更加先進」,同樣都係為神舟十六號升空成功講多句好話。

　　就喺神舟十六號前腳啱啱飛上太空,馬斯克就後腳登陸神州。之前3月就已經有傳馬斯克正係計劃到訪神州,《路透》當時就話有機會喺4月同國務院總理李強見面,結果過咗成個4月,到今日5月尾先正式來到,最新仲有孖屐消息話馬斯克頭先已經抵達神州,據講係會參觀Tesla嘅上海廠房,但係咪真係會獲李強接見就未知。

　　通常馬斯克嗰排同咩人合作,就會喺Twitter寧舍關注佢,尤其今日comment完神州太空科技,今日就已經來到,都好理所當然。孖屐一直盛傳馬斯克同神州嘅關係密切,所以今次特登飛過來,仲有可能獲國家級領導人接見,可能都係傾國家級生意。

　　雖然行程包括參觀Tesla上海廠房,不過揀正飛完神舟十六號嘅今日就來,就令人會聯想係咪同太空科技有更大嘅關係,因為如果只係有關Tesla嘅業務,都未必需要馬斯克親身來到,而更加大可能就係太空科技相關。馬斯克旗下SpaceX喺太空有條「星鏈」,呢條「鏈」喺之前俄烏戰爭入面都擔當非常重要角色,當時馬斯克就話唔想發生「第三次世界大戰」,所以就唔畀烏軍用「星鏈」作為通訊工具。所以戰略上來講,如果令到敵對地方用唔到「星鏈」,就可以切斷或者阻止到通訊。

　　所以,唔知今次馬斯克會唔會秉持「世界和平」原則,而決定唔畀某啲地方用「星鏈」。如今Tesla喺神州都擴張緊,如果馬斯克同神州「加大合作」,唔知Tesla喺神州又會唔會更加暢銷呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。