《小傳日記》B站掀起停更潮?單靠「用愛發電」邊夠照!

　　《小傳日記》啱啱先放榜嘅B站(09626),今日就傳出咗網站上面出現停更潮,主要原因係B站上年開始不斷搬龍門,令到啲KOL可以收到嘅分成愈來愈少,於是呢幾日就有好幾個百萬fans嘅KOL宣布暫停更新,令到呢壇嘢好快就揚起咗。

　　有上面行家就訪問到個別KOL,就明言B站分紅機制上年做咗好大調整,令到KOL上年嘅收益按年大減五至七成。其中有差唔多400萬fans嘅打機KOL「靠臉吃飯的徐大王」,就直接出片宣布停更,其中提到主要原因係做片無錢賺不特止仲要倒蝕,索性唔搞當放個長假。

　　B站要改分紅玩法由業績睇就可以略知一二,上年收入按年增加13巴仙至接近219億銀(人民幣.下同),不過經調整淨虧損按年擴大至67.02億銀。蝕錢不特止仲蝕多咗,主要就係開支撳唔到落嚟;2022年經營開支122億銀,按年多16巴仙有多,當中行政開支同研發開支都分別多37巴仙同68巴仙,而收入多咗嗰13巴仙遠遠填唔到呢個氹。

　　B站一向都有「用愛發電」嘅「美譽」,因為B站最初就係動漫fans嘅同好區,推動用戶造片upload嘅動力只係來自於自己對動漫嘅熱情,係不計收入,所以當講起錢上嚟,B站自然會出現好大衝突。而有趣嘅係,「嗶哩嗶哩」呢個名就係源自一個識自行用電攻擊嘅動漫角色,亦正好證明B站用愛發電嘅本質。

(00700)視頻號,就算快手(01024)成績表都已經大有起色,B站而家先行緊「節流」而仲未成功「開源」,連仲能夠發電嘅「愛」都保唔住,同視頻號、快手嘅距離只會越嚟越遠,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。